Рубрики
Архив новостей
Черилы колö отсöг
24 января 2020
Тöв шöр. Эжва юлöн поймаса посни гöпъясын чериыс пöдiс нин. Гырысьджык тыясын да вадъясын кислородыс ваас тшöтш чинiс и черилы öнi колö отсöг.
Юяс да тыяс век отсавлiсны коми йöзлы вуджны олöмлысь сьöкыд кад – тöв и гожöм, тулыс и ар вердлывлiсны чöскыд да пöтöса чериöн. Сöстöм ваа юясын да тыясын чери рöдмис-олiс бура, но и важся кадö пыдi вадъясын да тыясын чери мукöддырйи тöвнас пöдлывлiс.
Медводз кислород тырмытöм вöсна пöдöны ёкыш да визув ва вылын олысь черияс, кодъяс тулыснас пырисны ты-вадйö ыджыд ва дырйи. Сэсся воö кад сирясöдз. Медбöрын пöдö кельчи. Ловйöн кольö сöмын гыч, кодi вермö пырны аслыспöлöс анабиозö и сы вöсна олö быд джуджыдджык ва гöптын, кöнi ваыс тöвнас оз кынмы муöдзыс.
Тавося тöв медводдза джынйыс вöлi шоныд, пыдiтыяс вылын йиыслöн кызтаыс этша на – 15-20 см гöгöр сöмын. Но и сы пыр, абу кö йиас розьяс, сынöдсьыс ваас кислород пырны оз вермы. Та вöсна тыяс вылын тöв мöд юкöнас кадысь кадö колö вöчны розьяс – чери сэки оз пöд и быд во мöдас аттьöавны чери кыйысьясöс озыр кыйдöсöн ты-вадйын. Медым шоныд поводдя дырйи и тулысланьыс тыяс вылын водзджык воссясны розьяс, восьтöм йöрданас позьö сатшкыны пу зiб – сы кузя шоныдыс васьыс лыбö вывлань и сывдö йисö водзджык.
Комментарии (0)
Оставить комментарий
